გავიდა 18 წელი და ამ დღის აღსანიშნავად ორი გიჟური პერფორმანსიც ვიხილეთ. ჯოელ ემბიდისა და კარლ-ენტონი თაუნსის შესრულებით. ჯოელს ისედაც გამორჩეული სეზონი აქვს და ამ პერფორმანსით გიგანტური ნაბიჯი გადადგა კიდევ ერთ MVP-ის ჯილდოსკენ.

ფილადელფია vs სან ანტონიო

ჯოელმა რაც იკადრა უკვე ითქვა, ახლა კი დეტალურად მიყვეთ ყველაფერს. პირველ რიგში, უნდა ითქვას რომ მთელი თამაში ვემბანიამა ედგა, როცა ეს უკანასკნელი პარკეტზე იყო. ჯოელმა კი არც შეიმჩნია. ნამდვილად ასე იყო. შეგიძლიათ გადაამოწმოთ. კოსმოსიდან ორი რამ ჩანს გამოკვეთილად – ჩინეთის დიდი კედელი და ვიქტორ ვემბანიამა. ჯოელმა კი არ შეიმჩნია.

პირველი მეოთხედი სან ანტონიომ მოიგო – 35:34.

ჯოელ ემბიდმა 12 წუთში 24 ქულა ჩააგდო. ისედაც თავიდანვე მაგრად დაიწყო, ვემბანიამას გასვლის შემდეგ კი თითქოს ნახევარი ძალით აკეთებდა ყველაფერს. მეორე ნახევარში ექვსი წუთი ისე გავიდა ქულა არ აუღია, მერე კი ისევ შეუდგა საქმეს.

მეორე მეოთხედის ბოლოს ემბიდის ანგარიშზე 34 ქულა და 10 მოხსნა იყო. ორმაგი დუბლი უკვე ჯიბეშია, თან ეს მისი პირველი ნახევრის კარიერის პიკი გამოდგა, რა თქმა უნდა, წინ გაიხედა, ასეთ დროს რატომ უნდა გაჩერდე?!

მესამე მეოთხედში დაიწყო ის, რაც ასეთ დროს იწყება ხოლმე – ქომაგი ემბიდს აჰყვა და ყოველ მის ქმედებაში ეძებდა მომდევნო ქულების შესაძლებლობას. აჰყვა და დაიწყეს ღრიალი – MVP! MVP! ჯოელმაც მაგრად შეუბერა, აკრიფა ქულები, მესამე მეოთხედის ბოლოს სამქულიანიც გაუშვა და თავისი კარიერის პიკზე გავიდა – 59 ქულა. ეს პიკი ემბიდმა 2022 წლის ნოემბერში აიღო იუტასთან. აქ კი ბოლო მეოთხედი იყო დარჩენილი და ნათელი გახდა რომ ჯოელი ახალ პიკზე გავიდოდა.

ვიქტორ, რაც მოხდა მოხდა – ჯოელმა 70 ქულა ჩააგდო. ფილამ 133:123 მოიგო.

გარდა 70 ქულია, ჯოელ ემბიდმა 37 წუთში 18 მოხსნა და 5 ასისტიც დააგროვა. პლუს ერთი ჩაჭრა და ერთი ბლოკი. 2-დან 1 სამქულიანი ჩააგდო. FG – 24/41.

NBA-ის ისტორიაში მხოლოდ ორ მოთამაშეს აქვს 65 ქულას + 15 მოხსნა და 5 ასისტი, მაიკლ ჯოდრანს და უკვე ჯოელ ემბიდსაც. ამის შესახებ რეპორტიორმა თამაშის შემდეგ აცნობა, მისი რეაქცია კი ასეთი იყო:

“უილტს ეს არასდროს გაუკეთებია? არ მჯერა!”

ჩემბერლენის რეკორდი სიქსერსში 68 ქულა იყო, ჩიკაგოსთან, 1967 წელს. ემბიდმა მისი სიქსერსის ისტორიული რეკორდიც გააუმჯობესა. თუმცა, უილტს ფილადელფია/სან ფრანცისკო უორიორზში აქვს 5 ისეთი შეხვედრა სადაც 70 ან მეტი ქულა აიღო.

1962 წლის რეკორდი – 100 ქულა ნიუ-იორკ ნიქსთან დღემდე ხელშეუხებელია.

მოქმედი მოთამაშეებიდან 70 ქულა აუღია დევინ ბუკერს, ბოსტონ სელტიკსთან 2017 წელს. მოქმედი მოთამაშეებიდან რეკორდი დონოვან მიჩელსა და დემიან ლილარდს ეკუთვნით – 2023 წელს ორივემ 71 ქულა ჩააგდო.

• საერთო ჯამში, ყველა დროის მაჩვენებლით, ასევე 71 ქულა აუღიათ ელჯინ ბეილორსა და დევიდ რობინსონს.
• 72 ქულა უილტ ჩემბერლენს.
• 73 ქულა ორჯერ აიღო ჩემბერლენმა და ერთხელ დევიდ ტომპსონმა.
• მომდევნო პიკიც ჩემბერლენს ეკუთვნის – 78 ქულა.
• აქ გამოერია წარმოუდგენელი კობი ბრაიანტი – 81 ქულა.
• და რეკორდი – ჩემბერლენის 100 ქულა.

თაუნსის 62 ქულა!

ესეც მეორე სიგიჟე, ენტონი თაუნსმა 62 ქულა ჩააგდო. NBA-ის ისტორიაში მეოთხედ მოხდა რომ ერთი და იმავე დღეს, ორ მოთამაშეს ასეთი მაჩვენებელი აეღოს. ბოლოს ეს 1978 წელს მოხდა:

• დევიდ ტომპსონმა 73 ქულა აიღო, იმავე დღეს კი ჯორჯ გერვინმა 63 ქულა ჩააგდო;
• 1962 წელს, ჯერი უესტმა 63 ქულა ჩააგდო, იმავე დღეს ჩემბერლენმა 62 ქულის აღება შეძლო;
• 1961 წლის დეკემბერში ჩემბერლენმა 78 ქულა ჩააგდო, იმავე დღეს ელჯინ ბეილორმა 63 ქულა აიღო;

მინესოტამ როგორღაც მოახერხა და შარლოტთან დამარცხდა – 125:128.

თაუნსი კი შეუჩერებელი იყო – 38 წუთში 62 ქულა, 8 მოხსნა და 2 ასისტი დააგროვა. 15-დან 10 სამქულიანი ჩააგდო. FG – 21/35.

პირველ ნახევარში უკვე 44 ქულა ჰქონდა! 9-დან 8 სამქულიანი ზუსტად ისროლა. ბოლო გააფუჭა, თორემ შეეძლო პირველი ნახევარი იდეალურად დაეხურა – 8-დან რვა ზუსტი იყო.

ასეთი დღე იყო NBA-ში.

რეგულარული სეზონი

• დეტროიტი vs მილუოკი – 113:122
  იანისს სამმაგი დუბლი ჰქონდა – 31 ქულა, 17 მოხსნა და 10 ასისტი;
• ორლანდო vs კლივლენდი – 99:126
  გოგამ 9 წუთი ითამაშა და 2 ქულა ჩააგდო;
• ტორონტო vs მემფისი – 100:108
  ჯა მორანტს ისევ არ უთამაშია;
• დალასი vs ბოსტონი – 110:119
  დონჩიჩის სამაგი დუბლი – 33 ქულა, 18 მოხსნა, 13 ასისტი;
  ტეიტუმმა 39 ქულა ჩააგდო და 11 მოხსნა დააგროვა;
• ფინიქსი vs ჩიკაგო 115:113
  კევინ დურანტმა 43 ქულა ჩააგდო;
• საკრამენტო vs ატლანტა – 122:107

The post NBA – ჯოელ ემბიდის 70 ქულა! appeared first on Setanta Sports.

ამის დასტურად ნაპოლისა და ფიორენტინას ნახევარფინალის გახსენებაც კმარა, (3:0) იტალიის სუპერ თასი უმაღლესი მნიშვნელობის ტურნირი არასდროს ყოფილა, მაგრამ ახლა არაბების ატრაქციონს დაემსგავსა.

ფულს იხდიან, შესაბამისად, ასეთი გადაწყვეტილებაა მიღებული. მე კი იმედს გამოვთქვამ რომ პრემიერ ლიგის ტურნირები მაინც დარჩება იქ, სადაც ოდითგანვე ტარდებოდა. ნამდვილად, ინგლისი ყოფილა ფეხბურთის სამშობლო.

ნაპოლის შანსი

თავიდანვე ნათელი იყო რომ რთული სეზონი იქნებოდა. სპალეტიმ წასვლა გადაწყვიტა, აწყობილი გუნდის რეორგანიზება დაიწყო, რაც ყოველთვის მტკივნეული პროცესია. თან, ვერ ვიტყვით რომ რეორგანიზებისთვის დიდად წარმატებული ხალხი იქნა შერჩეული. დე ლაურენტისი მეტად უცნაური და ხუშტურიანი კაცია.

ამას თან დაერთო კვარაცხელიას კონტრაქტის თემა და უსამართლობის განცდა, ოსიმენთან ინციდენტი ჯერ ნაპოლის სოციალური ქსელის მენეჯერის გაუაზრებელი ქმედების გამო, შემდეგ კი კვარაცხელიას აგენტის გაუგონარი ქმედების გამო. ვიქტორს ისედაც არ ჰქონდა კარგი დრო, ტრავმიანობდა, ახლა კი აფრიკის თასზე აგრძელებს გამოსვლას. ისიც რთული ხასიათის კაცია და სიტყვა არ დაუკლია არც მენეჯერისთვის, არც მამუკა ჯუღელისთვის.

ამ ორომტრიალში კი გამოდის რომ დღეს ნაპოლის სეზონის მთავარი შეხვედრა ექნება, რადგან საეჭვოა რომ რომელიმე ტიტულთან ისე ახლოს მივიდნენ, როგორც ახლა არიან სუპერ თასის მოპოვებასთან.

ნაპოლი vs ინტერი – კვარაცხელია

ვერ არის ისეთ ფორმაში როგორც წინა სეზონში იყო, რაც ლოგიკურია. აწყობილ გუნდს იდეალურად მოარგო სპალეტიმ, ეტაპობრივად გაუზარდა სათამაშო დრო, ბოლომდე ენდო და ისტორიული ჩემპიონობაც იზეიმეს. ახლა კი სხვა დროა. ახლა კვარა სხვადასხვა მწვრთნელის ხელში ექსპერიმენტის ნაწილია.

მის თავს ბევრი რამ მოხდა, კონტრაქტი უკვე ვახსენეთ, ჯუღელისა და ოსიმენის გადაძახილებიც ვთქვით, მანამდე კი დიდი იმედგაცრუების ამბავი იყო, კვარა არ გააფრთხილეს და სანაკრებო ნახევარფინალს მიღმა დარჩა.

ამ ყველაფრის მერე, მე ის უფრო მაკვირვებს ქვის სროლა რომ არ დაუწყია. ბევრს უძლებს ეს ჯერ კიდევ ახალგაზრდა კაცი და უნდა იცოდეს რომ ვარსკვლავებად სწორედ ასეთი სიძნელეების გადალახვის შედეგად ყალიბდებიან.

დღეს ხვიჩა შეეცდება კიდევ ერთი ტიტული მოიპოვოს.

ინტერი ფავორიტია

არა მხოლოდ სუპერ თასის ფინალის, ჩემპიონატის ფავორიტიც ინტერია და ვიღაც-ვიღაცები ჩემპიონთა ლიგის ერთ-ერთ მთავარ ფავორიტადაც მოიაზრებენ, თუმცა, თავიდანვე რთული მეტოქე შეხვდათ.

ნაპოლისა არ იყოს, ინტერმაც მარტივად გაიარა ნახევარფინალი, ლაციო 3:0 დაამარცხეს. სერია ა-ში ერთი ქულით ჩამორჩებიან ლიდერ იუვენტუსს, თუმცა, თამაში აქვთ მარაგში.

საფეხბურთო კარიერის მანძილზე სიმონე ინძაგი ძალიან დიდხანს იყო ძმის ჩრდილში, ახლა კი მისი დროა, ჩრდილიდან გამოვიდა და უტოვებს ისტორიას იმ სახელს, რომელსაც წლების მერე სიამაყით გამოხედავს.

ოღონდ, საკითხავი ეგ არის, ინტერს რამდენ ხანს შემორჩება.

ფავორიტი ინტერია. ფურცელზე ასეა. სპალეტის ნაპოლისაც კი ძალიან უჭირდა ამ გუნდთან თამაში. ნაპოლის შანსი კი კვარაცხელიას მზადყოფნაზე გადის. თუ კვარამ საუკეთესო თამაში ვერ აჩვენა, ნაპოლი უშანსოდ იქნება.

აქვე ისიც ვთქვათ რომ ინტერის ვეტერანი ვარსკვლავები მარტში ბათუმს ეწვევიან და საქართველოს ნაკრების ლეგენდებთან ითამაშებენ. იქნება ძანეტი, ფიგუ, მატერაცი და სხვა ვარსკვლავები.

ის ძველი ნაპოლი

ნაპოლის აქამდე ორჯერ აქვს იტალიის სუპერ თასი მოგებული, ორჯერვე იუვენტუსის წინააღმდეგ. ასეთი ტკბილი იყო ორივეჯერ.

პირველად 1990 წელს მოიგეს, რა თქმა უნდა, დიეგო მარადონას კაპიტნობით. ფინალი შედგა სტადიონზე, რომელიც უკვე მის სახელს ატარებს. დიეგო წონაში იყო, უკვე გვარიანად გაბრუებული ნარკოტიკული ნივთიერებებით, მაგრამ მაინც მყარად იდგა და მიუძღვებოდა გუნდს გამარჯვებისკენ, ჰოდა, გადაიმტვრიეს იუვენტუსი. ეს უკვე სხვა იუვეა, მარადონას მთავარი მეტოქე მიშელ პლატინი კაი ხნის წასულია, სამაგიეროდ, ახალი ათიანია მოსული – რობერტო ბაჯო.

ბაჯომ ერთი შეაგდო საპასუხოდ – 5:1 ნაპოლის სასარგებლოდ. ასეთი ამბავი იყო.

მაშინდელი სერია ა დღემდე მიუწვდომელი სიმაღლეა.

მეორედ კი დიდი დრამა იყო, არგენტინული დრამა, იუვედან ტევესმა შეაგდო ორი, ნაპოლიდან გონსალო იგუაინმა. 2:2 ზე თერთმეტმეტრიანები დაინიშნა და ნაპოლიმ 6:5 მოიგო.

ასეთი კლუბისთვის ყველა ტიტული დიდი წარმატებაა.

ინტერს კი შვიდჯერ აქვს ეს თასი მოგებული.

ნაპოლი vs ინტერი – სად ვუყუროთ?

ნაპოლი vs ინტერი – მატჩის პირდაპირი რეპორტაჟის ნახვა Setanta Sports 1-სა და setantasports.com-ზე იქნება შესაძლებელი.

The post ნაპოლი vs ინტერი სუპერთასის ფინალი – წინათქმა appeared first on Setanta Sports.

სან ანტონიო vs ვაშინგტონი

სან ანტონიო მყარად არის დასავლეთ კონფერენციის ბოლო საფეხურზე. ვაშინგტონი აღმოსავლეთში ბოლოს წინა ადგილზეა, მხოლოდ დეტროიტს უსწრებს, რომელიც ისეთ შთაბეჭდილებას ტოვებს რომ საერთოდ არსებობა უნდა შეწყვიტოს.

სპურსმა მერვე შეხვედრა მოიგო სეზონში. რა თქმა უნდა, ვემბის დახმარებით, ცოტა უცნაურია ასეთი ვარსკვლავის ყურება ასეთ წყალწაღებულ ორგანიზაციაში, თუმცა, გეგმა არსებობს, პოპოვიჩს არსად არ ეჩქარება, მზად არის ეს სეზონიც ქარს გაატანოს, ოღონდ მომდევნო სეზონზე კარგი პიკი აიყვანოს და ვიქტორის ირგვლივ კონკურენტუნარიანი გუნდი შეკრას.

მერე კი უნდა ველოდოთ მაღლა სვლას. ეტაპობრივად, რა თქმა უნდა.

ბოლო მეოთხედში თამაშის დასრულებამდე ორი წუთით ადრე გადამწყვეტი გამოდგა ვემბის სამქულიანი, ამ სროლით ანგარიში გაათანაბრა და დარჩენილ დროში სან ანტონიომ დაწინაურებაც შეძლო – 131:127.

ფანებს უხარიათ. არ აქვს მნიშვნელობა რომელ ადგილზეა სპურსი, სან ანტონიოს დიდი საკალათბურთო კულტურა აქვს, მართალია ამ კულტურას ახლა მხოლოდ მოგონებები აცოცხლებს, მაგრამ იმედიც ცოცხალია, იმედი იმისა, რომ ისევ ნახავენ რაღაც ისეთს, რასაც 90-იანების მიწურულსა და 2000-იანების პირველ ნახევარში უყურებდნენ.

ვემბიმ 28 წუთში 24 ქულა, 8 მოხსნა, 4 ასისტი და 6 ბლოკი მიითვალა. 5-დან 2 სამქულიანი ჩააგდო. FG – 10/21.

საოცარი კალათბურთელია, საშიში პოტენციალით.

რეგულარული სეზონი

• დეტროიტი vs მილუოკი – 135:141
  დემიენ ლილარდმა 45 ქულა და 11 ასისტი დააგროვა;
• შარლოტი vs ფილადელფია – 89:97
  ემბიდის ანგარიშზე 33 ქულა და 10 მოხსნაა;
• ატლანტა vs კლივლენდი – 95:116
• ნიქსი vs ტორონტო – 126:100
• ჩიკაგო vs მემფისი – 125:96
• ჰიუსტონი vs იუტა – 127:126
• მინესოტა vs ოკლაჰომა – 97:102

The post NBA – სპურსმა სეზონში მერვე შეხვედრა მოიგო appeared first on Setanta Sports.

საბა გოგლიჩიძე ემპოლის ფეხბურთელია. საქართველოს U21 ნაკრების მცველის ტრანსფერის გარდა, ლევან მჭედლიძეს არაერთ აქტუალურ თემაზე ვესაუბრეთ.

სრული ინტერვიუს ნახვას მაყურებელი Setanta Sports 1-ის პირდაპირ ეთერში, 18 იანვარს 22:00 საათზე შეძლებს.

ლევან მჭედლიძე საბა გოგლიჩიძის ტრანსფერზე

“მე და საბა გოგლიჩიძე თანაგუნდელები ვიყავით ტორპედოში. ამ ტრანსფერში როგორც მეგობარი, ისე ვიყავი ჩართული. თუმცა იარლიყივით შემრჩა აგენტის სტატუსი.

ემპოლის შემოთავაზება, რომ საბას სათამაშო დროს მისცემდა, ჩვენს ინტერესში შედიოდა და ამ ფაქტორს უპირატესი მნიშვნელობა ჰქონდა. თორემ ემპოლი ერთადერთი იტალიური კლუბი არ ყოფილა, რომელიც საბას ტრანსფერით დაინტერესებული იყო.”

არაევროკავშირელის სტატუსზე

“არაევროკავშირელის სტატუსმა ამ ტრანსფერის დროსაც შეგვაფერხა. ფინანსებზე უფრო დიდი მნიშვნელობა ამ ფაქტორს აქვს.

ძალიან დიდი ნდობაა საჭირო – საქართველოს ჩემპიონატიდან წაიყვანო ფეხბურთელი და კვოტა შეავსო, რადგან ბრაზილიელიც, არგენტინელიც არაევროკავშირელია. გოგლიჩიძემ დაიმსახურა ეს ნდობა.

რომ არა ეს შეზღუდვები, ვფიქრობ, 3-4 წელიწადში ეს როგორც ნაკრებზე, ასევე ეროვნულ ჩემპიონატზე აისახება. ამ მხრივ, ურუგვაისა და ხორვატიასაც შეგვიძლია გავუტოლდეთ, და აღარ გაგვიკვირდება დიდ ფორუმებზე თამაში.”

კვარაცხელიას დისკვალიფიკაციაზე

“მოხდა ადამიანური შეცდომა. მე რომ ვთამაშობდე, გამოვიდოდი და პირველ რიგში, იმ ადამიანისთვის ვითამაშებდი.

იმედია, ლუქსემბურგს დავამარცხებთ, მერე ფინალში კვარაც გვეყოლება და ევროპის ჩემპიონატზე თამაშის ოცნებას ყველა ერთად ავიხდენთ.”

ლევან მჭედლიძე – ინტერვიუ

ცხადია, ხვიჩა კვარაცხელიას შესახებაც ვისაუბრეთ. კვარას ეფექტი შეუმჩენეველი არც ლევან მჭედლიძეს დარჩენია. მით უმეტეს, რომ ლევანმა თითქმის მთელი კარიერა იტალიაში გაატარა.

ვეტერანმა ქართველმა ფორვარდმა ის გუნდებიც დაასახელა, სადაც კვარას კარიერის გაგრძელებას ისურვებდა.

საქართველოს ნაკრები, ჯაბა კანკავას საკითხი, ვიქტორ ოსიმენისა და მამუკა ჯუღელის ამბავი, ინტერის ლეგენდების საქართველოში მომავალი სტუმრობა, ქართული საკლუბო ფეხბურთი და სერია A-ს სეზონის მოსალოდნელი 5-ეული და სხვა – ლევანმა საკუთარი მოსაზრება და ხედვა ყველა ამ თემაზე გაგვიზიარა.

სრული ინტერვიუს ნახვა 18 იანვარს, Setanta Sports 1-ზე, 22:00 საათიდან იქნება შესაძლებელი.

The post ქართველების მიმართ ინტერესი გაიზარდა – ლევან მჭედლიძე appeared first on Setanta Sports.